சைபீரியாவில் உருசிய விமானம் விபத்துக்குள்ளாகியதில் 31 பேர் உயிரிழப்பு

திங்கள், ஏப்பிரல் 2, 2012

மேற்கு சைப்பிரியாவில் தியூமென் நகரில் இன்று அவசரமாகத் தரையிறங்க முற்பட்ட உருசிய பயணிகள் விமானம் ஒன்று வீழ்ந்து நொறுங்கியதில் குறைந்தது 31 பேர் கொல்லப்பட்டனர். 12 பேர் உயிருடன் மீட்கப்பட்டு ஆபத்தான நிலையில் மருத்துவமனைக்குக் கொண்டு செல்லப்பட்டனர். விமானப் பணியாளர்கள் அனைவரும் இறந்து விட்டதாக காவல்துறையினர் தெரிவித்தனர்.

யூட் ஏர் நிறுவனத்துக்குச் சொந்தமான ஏடிஆர்-72 விமானம் 4 விமானிகளுடனும் 39 பயணிகளுடனும் சுர்குட் நகரை நோக்கிச் சென்றுகொண்டிருந்த போது விபத்துக்குள்ளானது. விமானத்தில் சிறுவர்கள் எவரும் இருக்கவில்லை.

விமானம் தரையிறங்கும் போது விமானத்தில் இரண்டு இயந்திரங்களிலும் இருந்து புகை கிளம்பியதாக நேரில் கண்டவர்கள் தெரிவித்தனர். ஏடிஆர்-72 என்ற இந்த விமானம் பிரெஞ்சு-இத்தாலியத் தயாரிப்பாகும்.

விபத்துக்கான காரணம் அறியப்படவில்லை. ஆனாலும், விமானத் தகவல் சேமிப்புப் பெட்டி கண்டெடுக்கப்பட்டுள்ளது. இதனை ஆராய்வதற்காக அதிகாரிகள் தலைநகர் மாஸ்கோவில் இருந்து சைபீரியாவுக்கு விரைந்துள்ளனர்.

கடந்த ஆண்டு சனவரி மாதத்தில் இதே விமான நிலையத்தில் ஜெட் விமானம் 124 பயணிகளுடன் சென்ற விமானம் தீப்பிடித்ததில் மூவர் உயிரிழந்தனர். செப்டம்பரில் இடம்பெற்ற விபத்தில் லோக்கோமோட்டிவ் யாரொசுலாவ் ஹாக்கி அணியின் பெரும்பாலான விளையாட்டு வீரர்கள் இறந்தனர்.

இச்செய்தி பற்றிய உங்கள் கருத்தை இங்கே பதியுங்கள்!

தொடர்புள்ள செய்திகள்

உருசிய விமான விபத்தில் பனி வளைதடியாட்டக் குழுவினர் உட்பட 43 பேர் உயிரிழந்தனர், செப்டம்பர் 8, 2011
சைபீரியாவில் ஜெட் விமானம் தீப்பற்றியதில் மூவர் உயிரிழப்பு, சனவரி 2, 2011
சைபீரிய விமான விபத்தில் 12 பேர் உயிரிழப்பு, ஆகத்து 3, 2010

மூலம்

Russian Airliner Crash Kills 31, ஏப்ரல் 2, 2012
Russian plane crash kills 31 in Siberia, பிபீச், ஏப்ரல் 2, 2012

இச்செய்தியைப் பகிர்க: